Este ano o departamento de Física e Química do IES Terra de Soneira trae a outro invitado de altura ao noso centro: Ramón Cid Manzano, excelente profesor de Física e Química e incrible divulgador científico. Falaranos do apaixonante campo da física de partículas e dos experimentos que se están a levar a cabo no Gran Colisor de Hadróns (LHC) do CERN.
Como aperitivo podedes ir mergullándovos no interesante sitio web Achegándonos ao LHC do que Ramón é coautor. Nel explica con rigor e claridade os aspectos máis importantes do Modelo Estándar da física de partículas e do funcionamento do acelerador LHC.
Máis alá de pretender dar resposta a preguntas que o ser humano sempre se fixo (cales son as partículas máis elementais que forman a materia?, cal foi a orixe e evolución do universo?), a investigación básica que se leva a cabo en lugares como o CERN conleva o desenvolvemento dunha infraestrutura que xera adiantos de gran utilidade social. Alguén de vós se preguntou algunha vez onde naceu a web (World Wide Web)? Pois si, no CERN...
Fonte: CERN
Ningún comentario:
Publicar un comentario